سوشل ميڊيا تي توهان جو تاثر

قصو ڪورونا جي ڏينهن جو آهي، جڏهن مون ريحان الله والا جي ڳالهين ۾ اچي وڊيو ٺاهڻ شروع ڪئي. تڏهن منهنجي فري لانسنگ جي سفر جي شروعات هئي، بئنڪ جاب اڃا هلي رهي هئي. منهنجو روٽين اهو هو ته صبح جو 4 وڳي اٿي فري لانسنگ جا ڪورس ڏسندو هوس، 6 وڳي تائين فارغ ٿي بئنڪ لاءِ تيار ٿيندو هوس، ۽ ناشتو ڪرڻ کان اڳ ڪنهن به موضوع تي هڪ وڊيو ٺاهي وٺندو هوس.

ڳوٺ ۾ صبح جو موسم ڏاڍو تازو ۽ خوبصورت هوندو آهي، جيڪو وڊيو کي ڏاڍو سٺو رنگ ڏيندو هو. هاڻي منهنجي هڪ ڏاڍي بري عادت آهي: آءٌ شيو باقاعدگيءَ سان نه ڪندو آهيان، ۽ اڄ به اها ئي عادت آهي.

هاڻي جڏهن توهان بئنڪ ۾ هجو ۽ فرنٽ ڪائونٽر اسٽاف هجو (آءٌ آپريشن مينيجر هوس) ته بئنڪ جا ڪسٽمر توهان کي لازمي فيس بڪ تي ايڊ ڪندا آهن، ڇاڪاڻ ته روزانو ڳالهه ٻولهه ٿئي ته دوستي ٿي وڃڻ هڪ فطري عمل آهي.

اهڙيءَ طرح هڪ ڏينهن وڊيو ٺاهي، اپلوڊ ڪري ڇڏي، بئنڪ پهتس ۽ پنهنجي روزاني ڌنڌي ۾ لڳي ويس. ڪو 11 يا 12 وڳي هڪ ڏاڍو پيارو دوست، جيڪو ڪاٽن فيڪٽريءَ جو مينيجر هو، ڪنهن ڪم سان بئنڪ آيو.

ڪيش ڪائونٽر تي وڃڻ کان اڳ سڌو مون وٽ آيو

چوڻ لڳو: خير ته آهي؟

آءٌ حيران ٿي ويس ۽ جواب ڏنم: ها ڀاءُ، سڀ خير آهي. ڇو، ڇا ٿيو؟

چوڻ لڳو: تنهنجي وڊيو ڏٺم. شڪل مان لڳو ته ڪٿي خودڪشي وغيره ته نه ٿو ڪرين. پوءِ خبر پئي ته فري لانسنگ ۽ آن لائن بابت خبر ناهي ڇا ٿو چوي، تنهن ڪري وڊيو بند ڪري ڇڏيم.

ڳالهه رڳو ايتري هئي ته شيو تمام گهڻي وڌيل هئي 😁

وڊيو اڃا به فيس بڪ ۽ يوٽيوب تي موجود آهي.